Pobail a Nascadh le hUachtaránachtaí na hÉireann ar an AE
Is deis thábhachtach d'Éirinn san Eoraip í Uachtaránacht na hÉireann ar Chomhairle an Aontais Eorpaigh in 2026 – agus is deis í chun pobail ar fud na tíre a thabhairt isteach i gcroílár na taithí sin.
In éineacht le clár foirmiúil na hUachtaránachta, tá tionscnamh for-rochtana agus rannpháirtíochta ar fud na tíre ag nascadh daoine ar fud na hÉireann le hobair an Aontais Eorpaigh agus le ról Eorpach na hÉireann. Tá an clár deartha chun go mbeidh an Uachtaránacht infheicthe, inrochtana agus ábhartha do dhaoine de gach aois agus de gach cúlra trí imeachtaí áitiúla, tionscnaimh oideachais, malartú cultúrtha agus comhpháirtíochtaí pobail.
Idir chathracha agus bhailte go pobail tuaithe, tá deiseanna á gcruthú ag an Uachtaránacht do dhaoine ar fud na hÉireann a bheith ag plé leis an Eoraip ar bhealaí fiúntacha, agus cultúr, pobail agus comhpháirtíochtaí Eorpacha na hÉireann á dtaispeáint do lucht féachana idirnáisiúnta ag an am céanna.
An tAire Gnóthaí Eachtracha agus Trádála, Helen McEntee TD i mbun plé le mic agus iníonacha léinn ó Choláiste na hOllscoile, Corcaigh.
An Chéad Ghlúin Eile a Spreagadh
Tá daoine óga i gcroílár chlár for-rochtana na hUachtaránachta.
Forbraíodh raon leathan acmhainní agus gníomhaíochtaí chun cabhrú le leanaí agus le daoine óga tuiscint níos fearr a fháil ar an Aontas Eorpach, ar thosaíochtaí Uachtaránacht na hÉireann agus ar thábhacht an chomhair Eorpaigh sa saol laethúil. Tá an clár deartha chun fiosracht, cruthaitheacht agus rannpháirtíocht a spreagadh, agus chun cabhrú le daoine óga áit na hÉireann a phlé ag an am céanna laistigh d'Eoraip atá ag athrú agus atá idirnasctha.
Mar chuid den saothar seo, tá leabhar do pháistí faoi Thosaíochtaí Uachtaránacht na hÉireann ar an AE á chur le chéile i gcomhpháirt le foilsitheoir, le húdar, agus le maisitheoir Éireannach a bhfuil duaiseanna buaite acu. Tá an leabhar deartha do pháistí idir 8-12 bliain d'aois agus tugann sé eolas do léitheoirí óga chun obair na hUachtaránachta agus tosaíochtaí na hÉireann a phlé ar bhealach inrochtana.
Cuirfear an foilseachán ar fáil ar líne, agus dáilfear cóipeanna ar dhaltaí sa séú rang ar fud na tíre i Meán Fómhair 2026.
Tá acmhainní breise atá dírithe ar dhaltaí meánscoile agus ar dhaoine óga idir 15-18 mbliana d'aois á bhforbairt freisin chun tacú le saoránacht ghníomhach agus rannpháirtíocht ghníomhach le linn thréimhse na hUachtaránachta.
Spreagfar daoine óga chun dul i ngleic go cruthaitheach leis an Aontas Eorpach trí chomórtais agus gníomhaíochtaí ar théama na hUachtaránachta atá nasctha leis na hacmhainní oideachais.
An tAire Stáit um Ghnóthaí Eorpacha, Thomas Byrne TD i mbun plé le Ibec.
Naisc Áitiúla a Thógáil ar Fud na hEorpa
Gné lárnach den chlár for-rochtana is ea tionscnamh ina ndéantar contaetha ar fud na hÉireann a phéireáil le Ballstáit an Aontais Eorpaigh le linn thréimhse na hUachtaránachta.
Beidh gach contae ceangailte le Ballstát eile den Aontas mar thoradh ar an tionscnamh, rud a chruthóidh deiseanna chun naisc dhíreacha Eorpacha a chothú.
Tá pobail ar fud na hÉireann ag cothú naisc dhíreacha le tíortha ar fud an Aontais Eorpaigh trí na comhpháirtíochtaí seo. Tá Ambasadóirí Bhallstáit an Aontais Eorpaigh in Éirinn, mar aon le hAmbasadóirí na hÉireann atá creidiúnaithe do na tíortha sin, ag tabhairt cuairt ar phobail chun páirt a ghlacadh in imeachtaí áitiúla agus i ngníomhaíochtaí for-rochtana.
Tá scoileanna, leabharlanna agus eagraíochtaí pobail i gceist leis na cuairteanna seo, rud a chabhraíonn le malartú cultúrtha, comhthuiscint agus naisc áitiúla níos láidre a chur chun cinn ar fud na hEorpa.
Ó Mheitheamh 2025, thug an tAire Stáit um Ghnóthaí Eorpacha, Thomas Byrne TD, cuairt ar phobail ar fud na hÉireann chun an Uachtaránacht a phlé agus teagmháil dhíreach a dhéanamh le daoine óga ach cuairteanna ar scoileanna agus leabharlanna a thabhairt. Chomh maith leis sin, chuaigh an tAire Gnóthaí Eachtracha agus Trádála, Helen McEntee TD i dteagmháil le mic léinn in institiúidí tríú leibhéal in áiteanna éagsúla sa tír mar chuid de chlár for-rochtana na hUachtaránachta, rud a spreagann plé agus rannpháirtíocht maidir le ról na hÉireann san Eoraip agus na deiseanna a thagann leis an Uachtaránacht.
Le chéile, cinntítear leis na tionscnaimh seo go bhfuil taithí ag daoine, ní hamháin ar leibhéal an rialtais ach freisin laistigh de phobail ar fud na hÉireann ar an Uachtaránacht agus roinntear an taithí sin le comhpháirtithe ar fud na hEorpa.
Spreagadh Údaráis Áitiúla ar fud na hÉireann chun imeachtaí cultúrtha agus pobail a sholáthar a théann i bhfeidhm ar a gceantar féin le linn na hUachtaránachta, agus beidh imeachtaí ar siúl i bpobail le linn théarma na hUachtaránachta.
Uachtaránacht ar Féidir le Daoine Taithí a Fháil Uirthi
Léiríonn cur chuige na hÉireann i leith for-rochtana agus rannpháirtíochta uaillmhian níos leithne na hUachtaránachta: deiseanna rannpháirtíochta, foghlama agus naisc a chruthú ar fud na tíre.
Tá sé mar aidhm ag an gclár tuiscint ar an Aontas Eorpach a neartú agus béim a leagan ar thábhacht chaidrimh agus chomhpháirtíochtaí na hÉireann ar fud na hEorpa ach an Uachtaránacht a oscailt do phobail agus do dhaoine óga.
Le linn 2026, tá ionadaíocht á déanamh ar Uachtaránacht na hÉireann ar an AE, ní hamháin in ionaid chomhdhála agus i seomraí cruinnithe ach i seomraí ranga, i leabharlanna agus i spásanna agus i bpobail chultúrtha ar fud na tíre freisin, rud a chruthaíonn Uachtaránacht ar féidir le daoine taithí a fháil uirthi, páirt a ghlacadh inti agus cuimhneamh uirthi.