Tá struchtúr bíse an réaltnéil le feiceáil ar an lógó oifigiúil, réaltnéal ar thángthas air den chéad uair in Éirinn sna 1840idí ag baint úsáid as an Mórtheileascóp i gCaisleán Bhiorra. Tá an patrún spreagtha ag saothar dealbhóireachta Éireannach freisin a léiríonn nasc le siombailí ársa na hÉireann, agus é athléirithe ar bhealach nua-aimseartha. Tá gach géag aonair den bhís 27 ndiosca ina siombail de 27 mBallstát de chuid an Aontais. Is éard atá sa spás a d’eascair as sin sa lár ná réalta cúig phointe, ar siombail ó bhratach an Aontais Eorpaigh í. Tá gorm, glas agus flannbhuí ina siombail ar stát na hÉireann agus ar an Aontas Eorpach araon.
Is é mana Uachtaránacht na hÉireann ar Chomhairle an Aontais Eorpaigh:
Ní neart go cur le chéile - Strength with unity.
Leagtar amach sa mhana fís atá dírithe ar dhaoine agus atá dírithe ar an todhchaí don Aontas bunaithe ar thrí chroíthéama: iomaíochas, luachanna agus slándáil. Cuirtear i láthair i nGaeilge agus i mBéarla é. Is í Uachtaránacht 2026 an chéad Uachtaránacht ina mbainfear úsáid as an nGaeilge ó tugadh aitheantas di mar theanga oibre iomlán de chuid an Aontais Eorpaigh in 2022.