Dlúthchuid den chlár is ea an ceol agus an léiriú closamhairc beo. Déanfaidh Jennifer Walshe agus Philip Venables The Alonetimes a chur i láthair sa Bheilg den chéad uair. Saothar úr comhoibríoch is ea é ina ndéantar scrúdú ar chaidrimh chomhaimseartha agus ar an gcumarsáid dhigiteach trí bhíthin giotaí de scéalta gutha. Rachaidh Sega Bodega i mbun a léirithe closamhairc bheo chaithisigh, i.e. unadulter8, in Bozar, ina ndéantar an ceol leictreonach, na fuaimeanna mórthimpeall agus an dearadh físe trialach a shníomh le chéile. In A Forbidden Distance le Saint Abdullah, Eomac agus Rebecca Salvadori, déantar fuaimeanna, scannáin agus ábhar ón gcartlann a fhuineadh le chéile d’fhonn scrúdú a dhéanamh ar theorainneacha, ar an gceangal a dhéantar trí fheidhm a bhaint as meáin éagsúla agus ar sholaoidí d’easáitiú daoine.
In imeacht liteartha speisialta ar shaothar Maggie O’Farrell, beidh deis ag daoine ar eolas a chur ar shaothar duine de na húrscéalaithe is mó le rá sa litríocht chomhaimseartha, agus beidh an scannánaíocht agus an íomhá ghluaisteach ina ndlúthchuid den chlár ó thus go deireadh. Déanfaidh Gerard Byrne clár léirithe agus caint ar an ealaín a chur i láthair ina scrúdófar a chleachtas ildisciplíneach siúd sa scannánaíocht, sa ghrianghrafadóireacht agus san fhoilseoireacht. I mórchlár gar-amhairc trí lá ina ndíreofar ar Vivienne Dick, scannánóir agus ealaíontóir, déanfar a saothar sin a rianú, ón ngluaiseacht No Wave i Nua-Eabhrac anuas go dtí a scannáin dhéanacha arna ndéanamh in Éirinn agus san Eoraip.
Beidh súiteán digiteach úr le Basil Al-Rawi, ina ndéantar an t-idirphlé idir an teicneolaíocht, an cultúr comhaimseartha agus an cleachtas ealaíne a leathnú, ina chuid den chlár freisin.
Tríd is tríd, sa chlár in Bozar, leagfar béim ar a fhairsinge atá cultúr comhaimseartha na hÉireann agus ar an idirphlé a bhíonn ar bun idir é agus an Eoraip trí bhíthin malartú ealaíne, trí bhíthin comhair agus trí bhíthin taithí chomhroinnte.