Fóram is ea Cinn Ghrúpa na nGníomhaireachtaí um Measúnú ar Theicneolaíocht na Sláinte (HAG) inar féidir ábhair a bhfuil tábhacht straitéiseach ag baint leo agus atá ábhartha do chomhlachtaí um measúnú ar Theicneolaíocht na Sláinte ar fud na hEorpa, inar féidir na hábhair sin a thógáil, a thabhairt chun suntais agus a phlé.
Tá 36 bhallghníomhaireacht ó 25 thír sa Limistéar Eorpach Eacnamaíoch in HAG faoi láthair.
Is iondúil go mbíonn Ceann gach gníomhaireachta HTA, Cathaoirleach, Comhchathaoirligh agus Rúnaíocht HAG, mar aon le hionadaithe sinsearacha ó Ghrúpa Comhordaithe HTA um Rialáil HTA agus ón gCoimisiún Eorpach, orthu sin a bhíonn i láthair ag cruinnithe HAG.
Tá ról tábhachtach ag HAG maidir le tacú le comhpháirtíochtaí láidre, maidir le réitigh éifeachtacha agus éifeachtúla a chur chun cinn i leith an chomhair Eorpaigh um measúnú ar theicneolaíochtaí sláinte, agus maidir le tionchar na measúnuithe ar theicneolaíochtaí sláinte ar an gcinnteoireacht agus ar chórais cúraim sláinte na hEorpa a threisiú.
Príomhchuspóir atá le cruinniú HAG faoi Uachtaránacht na hÉireann is ea béim a leagan ar chomhar, ar chomhordú agus ar chur chun feidhme leanúnach Rialachán an AE maidir le HTA agus, thairis sin, scrúdú a dhéanamh ar shaincheisteanna a bhfuil tábhacht straitéiseach ag baint leo do chomhaltaí uile HAG, go háirithe ós rud é go mbaineann siad sin le cur chun feidhme an Rialacháin.