Fáilte ón Aire Gnóthaí Eachtracha agus Trádála, Helen McEntee TD

Tá daoine ag tabhairt aghaidh ar éiginnteacht eacnamaíoch, éagobhsaíocht gheopholaitiúil agus ar na héifeachtaí a bhaineann le hathrú tapa domhanda ar fud ár mór-roinne. Is treise an tAontas Eorpach nuair a oibrímid i gcomhar lena chéile ag tráth mar seo agus muid ag freagairt go diongbháilte le dlúthpháirtíocht agus le muinín againn as ár dtodhchaí chomhroinnte.

Tá an Eoraip in ann a saoránaigh a chosaint, tacú le rathúnas inbhuanaithe agus seasamh leis na luachanna daonlathacha a léiríonn cé muid féin nuair a oibrímid i gcomhar lena chéile, sa bhaile agus i lár an aonaigh dhomhanda araon.

Ullmhúchán ar bhonn náisiúnta ba ea é ullmhúchán don Uachtaránacht go fírinneach. D'oibríomar i ndlúthchomhar leis na Ballstáit, le hinstitiúidí AE agus le páirtithe leasmhara ar fud na sochaí chun clár beartais uaillmhianach, forásach a mhúnlú. Rud atá chomh tábhachtach céanna, d'éisteamar le daoine ar fud na hÉireann. Chualamar go díreach faoi na saincheisteanna is tábhachtaí trí chomhairliúcháin, for-rochtain phobail agus teagmháil le daoine óga. Leis na comhráite sin, treisíodh an tábhacht a bhaineann leis an Aontas Eorpach a thugann buntáistí praiticiúla do ghnáthshaol laethúil daoine agus atá fós fréamhaithe sa dlúthpháirtíocht, sa daonlathas agus i ndeiseanna.

Tá ár gclár beartais bunaithe ar thrí thosaíocht atá nasctha go dlúth lena chéile: iomaíochas, luachanna agus slándáil. Léiríonn na tosaíochtaí seo in éineacht lena chéile an gá leis an Eoraip atá láidir ó thaobh an gheilleagair de, atá aontaithe ar bhonn sóisialta agus atá réidh chun dul i ngleic le domhan atá níos éiginnte ná riamh. Le linn ár nUachtaránachta, feidhmeoidh Éire mar idirghabhálaí neamhspleách, ag obair ar bhealach dearfach le comhpháirtithe chun clár oibre na Comhairle a chur chun cinn agus tacú le dul chun cinn ar phríomhthionscnaimh reachtacha agus bheartais.

Sna míonna amach romhainn, reáchtálfar níos mó ná 270 imeacht oifigiúil in Éirinn a bhaineann leis an Uachtaránacht, ina measc sin 22 Chruinniú Aireachta Neamhfhoirmiúla in áiteanna ar fud na tíre. Cuirfidh na himeachtaí seo deiseanna luachmhara ar fáil ó thaobh idirphlé, comhair agus malartú smaointe. Ina theannta sin, tabharfaidh siad deis dúinn cultúr, pobail agus tiomantas seanbhunaithe na hÉireann don chomhpháirtíocht Eorpach a thaispeáint.

Reáchtálfar cruinniú mullaigh den Chomhphobal Polaitiúil Eorpach in Éirinn, an ócáid is mó dá leithéid a reáchtáladh riamh sa tír, in éineacht le cruinniú neamhfhoirmiúil den Chomhairle Eorpach. Sa Bhruiséil, i Lucsamburg agus in Strasbourg, oibreoimid i ndlúthchomhar leis na Ballstáit, leis an gCoimisiún Eorpach agus le Parlaimint na hEorpa chun tionscnaimh a chur chun cinn lena neartófar athléimneacht, iomaíochas agus rannpháirtíocht na hEorpa leis an domhan mór.

Chreid Éire i luach an chomhair idirnáisiúnta agus san Aontas Eorpach mar fhórsa ar son na síochána, an rathúnais agus an dul chun cinn riamh anall. Agus muid ag ullmhú chun an Uachtaránacht a ghlacadh orainn féin arís eile, déanaimid amhlaidh le huaillmhian do thodhchaí na hEorpa agus le muinín as an méid is féidir a bhaint amach nuair a oibríonn tíortha le chéile i dtreo comhchuspóra. Táimid ag tnúth le bheith ag obair lenár gcomhpháirtithe Eorpacha chun cabhrú todhchaí níos láidre, níos sláine agus níos rathúla a thógáil do chách.